Այսօր Հայաստան է վերադարձել Գևորգ Սուջյանը, Դավիթ Դավթյանը, Վիգեն Էուլջեքչյանը և Վագիֆ Խաչատրյանը։ Նրանք Ադրբեջանի կողմից հանձնվել են Հայաստանի համապատասխան մարմիններին։
Ազատազրկված զինծառայողներից մեկը՝ Վագիֆ Խաչատրյանը, տեղափոխվել է «Նորք–Մարաշ» սրտաբանական բժշկական կենտրոն։ ՀՀ առողջապահության նախարար Անահիտ Ավանեսյանը այցելել է բժշկական կենտրոն՝ նրան տեսակցելու և նրա առողջական վիճակը գնահատելու համար։ Նախարարը լրագրողների հետ զրույցում նշել է, որ նրանք «ուրախ և երջանիկ են, որ մեր հայրենակիցները Հայաստանում են»։
Նախարարը հրաժարվել է մանրամասնել մյուս անձանց գտնվելու վայրի մասին, սակայն հաստատել է, որ նրանց առողջական վիճակը բավարար է։
Հիշեցնենք, որ Գևորգ Սուջյանը, Դավիթ Դավթյանը և Վիգեն Էուլջեքչյանը նախնական զննությամբ առողջական խնդիրներ չեն ունեցել, իսկ Վագիֆ Խաչատրյանի առողջական վիճակը նախնական գնահատվում է որպես բավարար։
Այսպիսով, ավարտվել է երկարատև բանակցությունների շրջանակում սկսված գործընթացը, որի արդյունքում հայտնի դարձավ նաև այլ հարցի լուծումը։ ՀՀ–ում ցմահ ազատազրկման դատապարտված 2 վարձկանները՝ Սիրիայի քաղաքացիներ Յուսեֆ Ալաաբեթ ալ-Հաջին և Մուհհռաբ Մուհամմադ ալ-Շխերին, Թուրքիայի միջոցով փոխանցվել են Սիրիայի Արաբական Հանրապետության իրավասու մարմիններին։
Հիշեցնենք, որ Վագիֆ Խաչատրյանը 2023թ․ հուլիսի 29-ին Ադրբեջանի սահմանապահ ծառայության կողմից առևանգվել էր՝ անհետաձգելի բուժօգնություն ստանալու համար Արցախից Հայաստան տեղափոխվելուց անմիջապես հետո։ Նրան մեղադրանք էր ներկայացվել իբրև 1991թ․ դեկտեմբերի 21-ին Խոջալուի շրջանի Մեշալի գյուղի բնակիչների դեմ հանցագործություններին մասնակցելու համար։ Խաչատրյանը դատական նիստերի ընթացքում անընդհատ հերքել է իրեն ներկայացված մեղադրանքները։
