ՀՀ ներքին գործերի նախարարությունը շարունակելու է խաղաղ հավաքների սպասարկումը օրենքով սահմանված կարգով։ Այս մասին հաղորդագրություն է տարածվել նախարարության կողմից՝ արձագանքելով Իրանի նորանշանակ դեսպան Խալիլ Շիրղոլամիի այսօրվա հայտարարությանը։
Իրանի դեսպանը ասուլիսի ժամանակ փաստացի մեղադրել էր հայկական կողմին դեսպանատան դիմաց ընթացող բողոքի ակցիաները թույլ տալու համար։
ՀՀ ՆԳՆ-ն իր հերթին նշել է, որ Հայաստանը, որպես ժողովրդավարական պետություն, պարտավոր է ապահովել քաղաքացիների ազատ տեղաշարժի և խաղաղ հավաքների ազատության իրավունքը՝ համաձայն ՀՀ Սահմանադրության, «Հավաքների ազատության մասին» օրենքի և միջազգային պարտավորությունների։
Նախարարությունը հստակեցրել է, որ բոլոր նշված հավաքները սպասարկվել են օրենսդրությամբ սահմանված կարգով՝ ապահովելով ինչպես հավաքների մասնակիցների, այնպես էլ դեսպանատան շենքի անվտանգությունը։
Հաղորդագրության մեջ նշվում է, որ հավաքներից մեկի ընթացքում մասնակիցներից մեկը Վարչական իրավախախտումների վերաբերյալ ՀՀ օրենսգրքի 182-րդ հոդվածով նախատեսված արարք կատարելու համար ենթարկվել է վարչական ձերբակալման։
ՆԳՆ-ն վերահաստատել է, որ Հայաստանը ապահովում է բոլոր հավատարմագրված դիվանագիտական ներկայացուցչությունների, այդ թվում՝ բարեկամական Իրանի Իսլամական Հանրապետության դեսպանության անվտանգությունը և երաշխավորում է բնականոն գործունեության համար անհրաժեշտ պայմանները։
