Արագածոտնի թեմը հայտարարում է, որ Սուրբ Հովհաննես Մկրտչի տոնի առիթով նախապես նախատեսված ուխտագնացություն-ուխտերթը, որը պետք է տեղի ունենար Կարբիի Սուրբ Աստվածածին եկեղեցուց դեպի Հովհաննավանք, չեղարկվել է։
Փոխարենը, տոնի օրը՝ հունվարի 15-ին, Կարբիի Սուրբ Աստվածածին եկեղեցում կմատուցվի սուրբ պատարագ։ Այս որոշումը կայացվել է հնարավոր բախումներից, անախորժություններից և տհաճ միջադեպերից խուսափելու նպատակով։
Թեմը տեղեկացրել է, որ ստացել է տեղեկություններ, թե Հովհաննավանքում հնարավոր են սադրիչ գործողություններ, որոնք կարող են խոչընդոտել սուրբ պատարագի մատուցմանը։ «Մեզ համար առաջնային է, որպեսզի Սուրբ օրը նշանավորվի խաղաղություն, հարգանք և խորհուրդով, այլ ոչ թե տհաճ իրադարձություններով»,- նշված է թեմի հայտարարության մեջ։
Կարբիի Սուրբ Աստվածածին եկեղեցում պատարագը կմատուցի Աշտարակի հովվության հոգևոր հովիվ տեր Մկրտիչ քահանա Երանյանը։
Տոնի առիթով Մայր աթոռ Սուրբ Էջմիածնից Գարեգին Երկրորդի տնօրինությամբ Կարբի կբերվի Սուրբ Հովհաննես Մկրտչի մասունքը։ Պատարագի սկիզբը նշանակված է ժամը 10:30։
