Հունվարի 5-ին «Սրբազան պայքար» շարժման առաջնորդ Բագրատ արքեպիսկոպոս Գալստանյանը և Մայր աթոռի դիվանապետ Արշակ արքեպիսկոպոս Խաչատրյանը հրապարակել են ուղերձ՝ նվիրված Սուրբ ծննդյան և Աստվածհայտնության խորհուրդներին։
Նրանք նշել են, որ 2026 թվականը պետք է լինի հույսի, սիրո և հավատքի տարի։ Ըստ նրանց՝ Աստվածորդու ծննդյան հրաշքը պետք է բերի նոր կյանք և հաղթանակ հայ ժողովրդին, որը, իրենց խոսքով, գտնվում է «ազատությունից բանտարգելության մեջ»։
Հոգևորականները մաղթել են, որ հայ ազգի կյանքից հեռանա չարիքն իր բոլոր դրսևորումներով՝ սուտը, կեղծիքը, ատելությունը, թշնամությունը, պարտությունը, վախը, ուրացումը, դավաճանությունը, դավադիր հոգին և անարդարությունը։ Նրանց մաղթանքներում այս բացասական երևույթները հակադրվում են ճշմարտությանը, արդարությանը, ազատությանը, պատվին, հավատարմությանը, նվիրումին, արիությանը, հաշտությանը, սերին և հաղթանակին։
Նրանք նշել են, որ 2025 թվականը լի էր «հալածանքների և փորձությունների»։ Ըստ նրանց՝ այս ժամանակահատվածը դարձել է «է՛լ ավելի հաստատվելու, զորանալու և հաստատակամ դառնալու կյանքի հանգրվան»։ Նրանք հղում են կատարել Տիրոջ պատգամին․ «Երանի նրանց, ովքեր հալածվում են արդարության համար, որովհետև նրանցն է երկնքի արքայությունը…»։
Հոգևորականները ընդգծել են, որ 2026 թվականը պետք է լինի համախմբման տարի, որի հիմնական նպատակը Հայաստանի և հայության, Սուրբ եկեղեցու, արդարության, ճշմարտության և պատվի հաղթանակն է։
Նրանք մաղթել են, որ Սուրբ ծննդյան հրաշքով հույսի Աստված լցնի ամբողջական ուրախությամբ և խաղաղությամբ, որպեսզի Սուրբ Հոգու զորությամբ առատանանք։ Նրանք կոչ են արել «դեն նետել խավարի գործերը և հագնել լույսի զենքերը»։
