ՀՀ-ում էլեկտրական էներգիայի արտադրության մոտ 30-35 տոկոսը, կախված տարվանից, արտադրվում է ջերմային էլեկտրակայաններում։ Հետևաբար, եթե գազի գինը թանկանա, ապա նշված տոկոսի չափով ազդեցությունը կունենա էլեկտրական էներգիայի արտադրության սակագնի վրա։
Այնուամենայնիվ, կարող եմ վստահեցնել, որ այս իրավիճակը չի հանգեցրի աշխարհացունց բաների։ Ինչպես նշել եմ լրագրողների հետ կատարած ճեպազրույցում, գազի գնի թանկացումը կարող է առաջացնել անցումային փուլում որոշակի դժվարություններ, բայց հովհարային անջատումների կամ օրերով ու ժամերով հոսանքազրկումների պատկեր չի ստեղծվի։
Սա հնարավոր է դառնալու շնորհիվ, որ Հայաստանը վերականգնվող էներգետիկայի զարգացման ճանապարհով է գնում։ Մեր իրականությունում արևային կայանների գոյությունը մեզ կապահովագրի ցանկացած ծանր էներգետիկական կրիզիսի դեմ։
Այսպիսով, ցանկացած թանկացում, որը կարող է տեղի ունենալ, կլինի կառավարելի և կունենա կանխատեսելի ազդեցություն։
ՀՀ-ում գազի սակագները վաճառվող գազի մասին ռուսական կողմի հետ կնքված պայմանագրի շրջանակում են, որի ժամկետը մինչև 2027 թվականի սկիզբն է։ Հետևաբար, առաջիկա 6 ամսում ցնցումային իրավիճակ չի լինի։
Անցած տարիների ընթացքում գազի համակարգում ձևավորվել են լրացուցիչ օգուտներ, որոնք բավականին մեծ գումար են կազմում։ Անհրաժեշտության դեպքում այդ լրացուցիչ օգուտները կարող են որոշակի ժամանակահատված ուղղվել գազի սակագնի մեղմմանը, որպեսզի կենցաղային սպառողները ծանր սոցիալական վիճակում չհայտնվեն։
Միևնույն ժամանակ, Հայաստանը շարունակում է ակտիվորեն փնտրել գազի այլ շուկաներ։ Պայմանագրի ավարտից հետո և դրա չերկարացման դեպքում մենք կարող ենք գազը գնել նաև Ադրբեջանից, Իրանից և Թուրքմենստանից։
