Այս գիշեր Գյումրու խորհրդանշական «Մայր Հայաստան» հուշահամալիրից անհայտ անձը կամ անձինք պոկել են հերոս–քաղաքների անվանումների ոսկեգույն տառերը։ Առավոտյան կոմունալ ծառայության աշխատակիցները հայտնաբերել են տառերը աղբամանում։
Տառերը պոկելու հետևանքով հուշահամալիրի քարերի վրա մեծ անցքեր և վնասվածքներ են առաջացել։ Ներկայումս փորձվում է տառերը հաջորդականությամբ դասավորել և ամրացնել իրենց տեղերում։
Գյումրու քանդակագործության ազգային պարկ–թանգարանի վարիչ Արթուր Գևորգյանը դեպքը բնութագրել է որպես վանդալիզմ, որը ուղղված է նրանց հիշատակին, ովքեր կռվել են այդ քաղաքներում, հերոսացել են, շքանշաններ են ստացել և սերունդներ դաստիարակել։ Նրա խոսքով՝ առանձնահատուկ է այն, որ վանդալները թողել են հնգաթև աստղերը, բայց ոչնչացրել են քաղաքների անվանումները։
«Սա պետք է համապատասխան արձագանք ստանա իրավապահների կողմից, քանի որ նման բան «Մայր Հայաստան» անվանումով հուշահամալիրում անթույլատրելի է»,– ընդգծել է Գևորգյանը։
Քաղաքապետարանը նշել է, որ հաշվի առնելով տառերի թանկարժեք չլինելը, տեղի ունեցածը շահադիտական կողոպուտ չէ։ Ընդգծվել է, որ սա պարզապես գույքի վնասում չէ, այլ հուշարձան է, որը խորհրդանշում է Հայրենական մեծ պատերազմում իրենց կյանքը զոհաբերած հայորդիների սխրանքն ու հիշատակը։
Արթուր Գևորգյանը չի բացառել, որ սա կարող է լինել երրորդ ուժի կողմից կազմակերպված գործողություն՝ հայ–ռուսական հարաբերություններում սեպ խրելու նպատակով։ Նա, սակայն, կարծում է, որ նման փորձը ձախողվելու է, քանի որ մասնագետները ներկայում աշխատում են վերականգնման աշխատանքների վրա։
Գյումրու համայնքապետարանը դեպքի առթիվ պաշտոնական հաղորդում է ներկայացնելու ոստիկանության։
