Այսօր՝ մարտի 28-ին, Երևանում տեղի ունեցավ յուրահատուկ միջոցառում, որը նվիրված էր «Երկրի ժամ» միջոցառմանը։ Ժամը 20:30-ին, ի նշան Երկիր մոլորակի նկատմամբ հարգանքի, մեկ ժամով անջատվեց Երևանի փողոցների և շենքերի ոչ հիմնարար արտաքին լուսավորությունը։
Հանրապետության հրապարակում, որտեղ կազմակերպվել էր միջոցառումը, հազարավոր մոմեր վառվեցին, և այնտեղ հնչեց կենդանի երաժշտություն։ Երևանի քաղաքապետարանի աջակցությամբ, «Բնության համաշխարհային հիմնադրամի» հայաստանյան մասնաճյուղը «Candlenight Concerts»-ի հետ համագործակցությամբ կազմակերպել էր այս 20-րդ «Երկրի ժամին» նվիրված իրադարձությունը։
«Երկրի ժամը» սկիզբ է առել 2007 թվականին Սիդնեյում և դարձել աշխարհի ամենամեծ բնապահպանական շարժումը։ Այն ոգեշնչում է միլիոնավոր մարդկանց բնության և Երկիր մոլորակի պահպանության համար լուծումներ գտնելու և միջոցներ ձեռնարկելու շուրջ։ Այս միջոցառմանն ամեն տարի մասնակցում է ավելի քան 190 երկիր և 7 000 քաղաք՝ կառավարություններ, քաղաքապետարաններ, կազմակերպություններ և միլիոնավոր քաղաքացիներ։
