«Միասնության թևեր» կուսակցության վարչապետի թեկնածու Արման Թաթոյանը բաց նամակով դիմել է ԱՄՆ պետքարտուղար Մարկո Ռուբիոյին՝ հայտնելով իր լիակատար աջակցությունը «Թրամփի ուղի» (TRIPP) նախագծին։
Նամակում նա նշել է, որ վարչապետ դառնալու դեպքում իր առաջնահերթություններից է սերտ համագործակցությունը ԱՄՆ գործող վարչակազմի հետ՝ նպատակ ունենալով ապահովել այդ նախագծի լիարժեք և արդյունավետ իրականացումը։
Թաթոյանը նաև ընդգծել է, որ «Թրամփի ուղի» նախագծի հաջող իրականացման համար առանցքային պայման է Ադրբեջանի կողմից իր զինված ուժերի դուրսբերումը Հայաստանի ինքնիշխան տարածքից, ինչպես նաև ապօրինի պահվող հայ գերիների և պատանդների անհապաղ ազատ արձակումը։
«Նախագահ Թրամփը նախագահ Բայդենին անվանել էր տխուր, թույլ և անխելք, ես այդ բառերը վերագրում եմ վարչապետ Փաշինյանին, որը չափազանց տխուր, թույլ ու անխելք է, որպեսզի այս կարևոր հարցերը Ձեզ հետ հանդիպմանը բարձրացնի»,- նշել է Թաթոյանը՝ ընդգծելով, որ այդ հարցերը պետք է դառնան բանակցությունների հիմնական թեմաները։
Նա վստահություն է հայտնել, որ համատեղ աշխատանքը հնարավոր կդարձնի մեր տարածաշրջանում երկարաժամկետ խաղաղության հաստատումը։
Հիշեցնենք, որ «Թրամփի ուղի» (TRIPP) նախագիծը նախատեսում է ստեղծել ռազմավարական տարանցիկ ճանապարհ Հայաստանի հարավային հատվածով (Սյունիքի մարզ), որը կապահովի Ադրբեջանին առևտրային հասանելիություն դեպի Նախիջևան։ Այս նախագիծը ստորագրվել է 2025 թվականի օգոստոսի 8-ին Հայաստանի և Ադրբեջանի ղեկավարների կողմից՝ ԱՄՆ-ի ներկայությամբ։
