ՀՀ կենտրոնական բանկի նախագահ Մարտին Գալստյանը բացատրել է դոլարի նկատմամբ դրամի արժևորման պատճառը։ Նրա խոսքով՝ այս փոփոխության հիմքում դեպի Հայաստան ֆինանսական հոսքերի ավելացումն է։
Կենտրոնական բանկը շարունակում է իրականացնել միջամտություններ արտարժութային շուկայում՝ կանխելու համար անհավասարակշռությունները։ Սակայն, ըստ Գալստյանի, հոսքերի ծավալները այնքան մեծ են, որ դրանք ազդեցություն են ունենում փոխարժեքի վրա։
«Մենք շարունակում ենք միջամտել շուկային, բայց տեսնում ենք, որ հոսքերն այնքան են մեծացել, որ փոխարժեքի վրա որոշակի ազդեցություն է լինում»,- նշել է նախագահը՝ ավելացնելով, որ նման գործընթացներ նկատվում են նաև Ռուսաստանում, որտեղ եվրոն նույնպես թանկացել է դոլարի նկատմամբ։
Մարտին Գալստյանը նաև նշել է, որ դժվար է կանխատեսել զարգացումների հետագա ընթացքը։ Նրա խոսքով՝ եթե Հորմուզի նեղուցի շուրջ ստեղծված լարվածությունը կամրապնդվի, դրա ազդեցությունը դեռևս որոշակի ժամանակահատված զգալու է լինելու, հատկապես որոշ ապրանքների, այդ թվում՝ էներգակիրների գների վրա։
Վերջին մեկ ամսվա ընթացքում դոլարի փոխարժեքը Հայաստանում նկատելիորեն էժանացել է՝ 373 դրամից հասնելով մինչև 368 դրամ։
