Առավոտյան Հակակոռուպցիոն կոմիտեում ընթացող քրեական վարույթի շրջանակում ձերբակալվել են ՀՀԿ-ական նախկին պատգամավոր, Պետական գույքի կառավարման վարչության նախկին պետ Արման Սահակյանը և մի քանի այլ նախկին բարձրաստիճան պաշտոնյաներ։
Նրանց մեղադրանք է առաջադրվել ՀՀ քրեական օրենսգրքի տարբեր հոդվածներով նախատեսված հանցավոր արարքներ կատարելու կապակցությամբ։ Հակակոռուպցիոն կոմիտեի ներկայացուցիչները հաստատեցին լուրը՝ նշելով, որ նախաքննության շահերից ելնելով, այլ տեղեկատվություն հրապարակման համար չեն կարող տրամադրել։
Այսօր, ապրիլի 8-ին, Արման Սահակյանի հոր՝ ԱԺ նախկին նախագահ Գալուստ Սահակյանի ծննդյան օրն է։
Հիշեցնենք, որ Արման Սահակյանին նախորդ մեղադրանք էր առաջադրվել դեռևս 2020 թվականին։ Նրա նկատմամբ կիրառվել էր խափանման միջոց՝ գրավը, որի չափը կազմում էր 5 մլն դրամ։
2024 թվականի հուլիսի 1-ին հայտնի դարձավ, որ Արման Սահակյանը պետությանը պատճառած 178 մլն դրամը վերականգնել է։
2025 թվականի հունվարին դատարանի որոշմամբ նրա նկատմամբ կիրառվեց այլընտրանքային խափանման միջոց՝ վարչական հսկողություն, ինչի արդյունքում նա չկալանավորվեց։
