Ռուսաստանը շահագրգռված է Հայաստանի հետ հարաբերությունների հետագա զարգացմամբ։ Այս մասին ասված է ՌԴ նախագահ Վլադիմիր Պուտինի շնորհավորական ուղերձում ՀՀ վարչապետ Նիկոլ Փաշինյանին՝ ծննդյան օրվա առթիվ։
«Հարգելի Նիկոլ Վովայի, ընդունեք անկեղծ շնորհավորանքներս Ձեր ծննդյան օրվա առթիվ։ Մեր երկրների և ժողովուրդների միջև հարաբերություններն ավանդաբար կրում են բարեկամական բնույթ։ Եվ մենք շահագրգռված ենք դրանց հետագա առաջանցիկ զարգացմամբ», – ասված է Կրեմլի կայքում հրապարակված ուղերձում։
Պուտինը Փաշինյանին մաղթել է առողջություն, բարեկեցություն և հաջողություններ։ Նիկոլ Փաշինյանը հունիսի 1-ին դարձավ 51 տարեկան։
Ավելի վաղ ՌԴ նախագահը Աստանայում հայտարարել էր, որ Ռուսաստանը ստիպված կլինի դադարեցնել Հայաստանի հետ ինտեգրացիոն գործընթացներին վերաբերող բոլոր աշխատանքները, եթե Երևանը որոշում կայացնի դուրս գալ Եվրասիական տնտեսական միությունից։
Հիշեցնենք, որ ՀՀ վարչապետը հայտարարել է, որ Հայաստանը երջանիկ կլինի, եթե իրեն ընդունեն Եվրամիություն, բայց միևնույն ժամանակ նշել է, որ Հայաստանը շարունակում է մնալ ԵԱՏՄ լիիրավ անդամ, և երկու միավորումների միջև ընտրության հարցը որոշելու է ժողովուրդը, ոչ թե երկրի ղեկավարությունը։
Մայիսի 9-ին Պուտինն ասուլիսի ժամանակ կարծիք էր հայտնել, որ թե՛ ՀՀ քաղաքացիների, թե՛ Մոսկվայի՝ գլխավոր տնտեսական գործընկերոջ հանդեպ ճիշտ կլիներ, որ պաշտոնական Երևանը հնարավորինս արագ կողմնորոշվեր ԵՄ-ին անդամակցելու հարցում։
Փաշինյանը մայիսի 11-ին հաստատել էր, որ Հայաստանը մնում է ԵԱՏՄ լիարժեք անդամ, իսկ այդ հարցով հանրաքվեի անցկացումը հնարավոր է միայն «օբյեկտիվ անհրաժեշտության» դեպքում։
Այս իրադարձությունների ֆոնին ՌԴ փոխվարչապետ Ալեքսեյ Օվերչուկը հայտարարել էր, որ Հայաստանում ինչ-որ աշխատանք է տարվում ԵՄ չափանիշներին անցնելու ուղղությամբ, և եթե ՀՀ սկսի փոփոխություններ մտցնել տեխնիկական կանոնակարգերում, դա արդեն որոշակի սպառնալիքներ կստեղծի ԵԱՏՄ-ի համար։
Մայիսի 28-ին ԵԱՏՄ անդամ պետությունների ղեկավարները Հայաստանի վերաբերյալ հայտարարություն էին ընդունել, որտեղ կոչ էին անում Հայաստանին որքան հնարավոր է շուտ համազգային հանրաքվե անցկացնել՝ ԵՄ-ին միանալու կամ ԵԱՏՄ-ում մնալու վերաբերյալ։
Եվրասիական տնտեսական միությունը ստեղծվել է 12 տարի առաջ։ Միավորման անդամներն են Ռուսաստանը, Հայաստանը, Բելառուսը, Ղազախստանը և Ղրղզստանը։ Ստեղծումից ի վեր միության ՀՆԱ-ն աճել է 1.6 տրիլիոն դոլարից մինչև 3.01 տրիլիոն դոլար, անդամ պետությունների միջև փոխադարձ առևտրի ծավալը կրկնապատկվել է, իսկ երրորդ երկրների հետ առևտրաշրջանառությունն աճել է 72%-ով։ Կանխատեսումների համաձայն՝ մինչև 2025 թվականի ավարտը միության ՀՆԱ-ն կաճի 1.7%-ով։
