Ռուսաստանի գյուղատնտեսական մշակույթի և սննդային արտադրանքի վերահսկողության ծառայությունը (Ռոսսելխոզնադզոր) հունիսի 2-ից սահմանափակում է Հայաստանից կորիզավոր պտուղների և թարմ խաղողի ներմուծումը։
Գերատեսչության հաղորդագրության համաձայն՝ որոշումը կայացվել է այն բանից հետո, երբ արձանագրվել է, որ ՌԴ արտահանվող հայկական մրգերի մատակարարումների ժամանակ խախտումների դեպքերը հաճախակիացել են։
Սահմանափակումները կտարածվեն Հայաստանում արտադրվող և այնտեղից առաքվող կեռասի, բալի, ծիրանի, սալորի, դեղձի և նեկտարինի պտուղների, ինչպես նաև թարմ խաղողի վրա։ Այն կգործի մինչև այն պահը, երբ մշակվի և ներդրվի առաքվող արտադրանքի անվտանգության ապահովման համապատասխան ալգորիթմ։
Հիշեցնենք, որ Ռոսսելխոզնադզորը մայիսի 30-ից սահմանափակել է Հայաստանից պտուղ-բանջարեղենի ներկրումը, իսկ մայիսի 22-ից՝ ծաղիկների ներկրումը։
ՌԴ տնտեսական զարգացման նախարար Մաքսիմ Ռեշետնիկովը նշել է, որ այս սահմանափակումները ազդեցություն չեն ունենա Ռուսաստանում գնաճի վրա։ Նրա խոսքով՝ Ռուսաստանն իր սպառման հիմնական ծավալը բավարարում է սեփական արտադրության հաշվին և ունի մատակարարների բավականին դիվերսիֆիկացված կառուցվածք։
