Արցախի նախկին պետնախարար, գործարար և բարերար Ռուբեն Վարդանյանի կինը՝ Վերոնիկա Զոնաբենդը, ընտանիքի անունից բաց նամակ է հրապարակել՝ շնորհակալություն հայտնելով մարդկանց ցուցաբերած համերաշխության, կարեկցանքի և աջակցության համար։
Նամակում նշվում է, որ մայիսի 25-ին՝ Ռուբենի ծննդյան օրը, ընտանիքը ստացել է հաղորդագրություններ, աղոթքներ, աջակցության հրապարակային խոսքեր և բարի արարքներ, որոնք մեծ ուժ և հույս են հաղորդել։
«Անորոշության պահերին այն գիտակցումը, որ բազմաթիվ մարդիկ կանգնած են մեր կողքին, մեծ մխիթարություն է մեզ համար»,- գրել է Վերոնիկա Զոնաբենդը։
Նա հատուկ շնորհակալություն է հայտնել նրանց, ովքեր ֆինանսական աջակցություն են ցուցաբերել Ռուբեն Վարդանյանի հիմնադրած նախագծերի իրականացման համար՝ Դիլիջանի եկեղեցու կառուցմանը, UWC Դիլիջանին և Տաթևի մանկական խաղահրապարակին։
«Յուրաքանչյուր ներդրում, անկախ չափից, հոգատարության և մարդկայնության հզոր ուղերձ է»,- շեշտել է նա։
Վերոնիկա Զոնաբենդը նամակն ավարտել է՝ նշելով, որ ցուցաբերված համերաշխությունը հիշեցնում է, որ կարեկցանքն ու մարդկային արժանապատվությունը վեր են ամեն ինչից։
Հիշեցնենք, որ Արցախի նախկին պետնախարար Ռուբեն Վարդանյանը ձերբակալվեց 2023 թ. սեպտեմբերի 27-ին՝ Լաչինի միջնացքով Հայաստան տեղափոխվելու ժամանակ։ 2026 թ. փետրվարի 17-ին Բաքվի դատարանը նրան դատապարտեց 20 տարվա ազատազրկման։
