Սահմանադրական դատարանը զրկեց հայաստանց քաղաքացիներին ռեալ պառլամենտարիզմ ունենալու հնարավորությունից՝ հրաժարվելով անվավեր ճանաչելու ընտրությունների արդյունքները։ Այս մասին հայտարարեց «Բարգավաճ Հայաստան» կուսակցության ներկայացուցիչ Արամ Օրբելյանը՝ ճեպազրույցի ժամանակ։
Քիչ առաջ Սահմանադրական դատարանը հրապարակեց իր որոշումը, որով հաստատում է Կենտրոնական ընտրական հանձնաժողովի (ԿԸՀ) որոշումը՝ թույլ տալով, որ այն մնա ուժի մեջ։
Օրբելյանը նշեց, որ այս գործը որակապես տարբերվում էր նախորդներից։ «Երբ քննարկում էինք գործընկերների հետ, հարցին՝ հույս կա՞, ես պատասխանեցի՝ հույս կա, սակայն հավատ չկա։ Այս դեպքում մանդատներ ստանալ կամ չստանալու հանգամանքը կախված էր բացառապես ԿԸՀ-ի ընդունած որոշումից»,– ասաց նա։
Նրա խոսքով՝ Սահմանադրական դատարանը կարող էր վերահաստատել, որ ընտրություններին տեղի են ունեցել խախտումներ, ինչը կբարձրացներ վստահությունը դատական համակարգի նկատմամբ։ «Որոշ ժամանակ հետո կպարզվի, թե ինչ հանգամանքներ են ազդել նմանատիպ որոշման կայացման վրա»,– ավելացրեց Օրբելյանը՝ չպատասխանելով հարցին՝ արդյոք նա նկատի ունի քաղաքական հրահանգ։
Նա ընդգծեց, որ իրենց արձանագրած խախտումները տեղի են ունեցել բոլորի աչքի առաջ, և ԿԸՀ-ն, տեղյակ լինելով դրանց մասին, դիտավորյալ չի կանգնեցրել քվեարկությունը։
Օրբելյանը նաև նախազգուշացրեց, որ ՀՀ բոլոր քաղաքական ուժերը պետք է պատրաստ լինեն, որ ԿԸՀ-ն հետագայում ցանկացած քանակի տեղամասեր ուղղակի անվավեր է ճանաչելու։ Նրա խոսքով՝ իրականում հանձնաժողովը 30 տեղամասում կճանաչեր արդյունքները անվավեր, և, օրինակ, «Հայաստան» դաշինքն էլ չէր հաղթահարի 8 տոկոսի շեմը։ Այսպիսով, ԿԸՀ-ն կարող էր ազդել ընտրությունների արդյունքների վրա։
Ինչ վերաբերում է «Բարգավաճ Հայաստան» կուսակցության հետ կապված հետագա քայլերին, ապա, Օրբելյանի խոսքով, իրավական մի քանի գործընթաց կքննարկվեն, և հետագա գործողությունները կլինեն պարզ։
Հիշեցնենք, որ հունիսի 7-ին Հայաստանում անցկացվեցին ԱԺ ընտրություններ, որոնց մասնակցեց 16 կուսակցություն և 2 դաշինք։ Նախնական արդյունքներով ԲՀԿ-ն ստացել էր ընտրողների քվեների 4%-ը։ Ավելի ուշ ԿԸՀ-ն անվավեր ճանաչեց 3 ընտրատեղամասերի քվեարկության արդյունքները, ինչի հետևանքով կուսակցությունը կորցրեց 213 քվե՝ փաստացի չկարողանալով հաղթահարել 4% անցողիկ շեմը։ Հունիսի 14-ին ԿԸՀ-ն հրապարակեց վերջնական արդյունքները, համաձայն որի՝ ԲՀԿ-ն չի անցնում խորհրդարան։
