«Ուժեղ Հայաստան» դաշինքի առաջնորդ Սամվել Կարապետյանը հարցազրույցի ընթացքում անդրադարձել է Հայաստան-Ռուսաստան հարաբերությունների վերջին լարվածությանը և դրա պատճառներին։
Նրա խոսքով՝ Ռուսաստանից հնչող հայտարարությունները, որոնք վերաբերում են բնական գազի, նավթամթերքի և չմշակված ադամանդների մատակարարման համաձայնագրի հնարավոր չեղարկմանը, ինչպես նաև պտուղ-բանջարեղենի և ծաղիկների ներկրման սահմանափակումներին, ուղղակիորեն կապված են Հայաստանի իշխանությունների կողմից իրականացվող հակառուսական քաղաքականության հետ։
Կարապետյանը նշել է, որ Հայաստանը փոքր երկիր է և չունի իրավունք թշնամական հարաբերություններ ստեղծելու գերտերությունների հետ, հատկապես այնպիսի երկրի հետ, ինչպիսին Ռուսաստանն է։ Նրա խոսքով՝ Հայաստանի տնտեսության հիմնական մասը, և հատկապես գյուղատնտեսության 90 տոկոսը, կախված է Ռուսաստանից։
«Մենք մեր անիմաստ քայլերով, հայտարարություններով ամեն օր փչացնում ենք այդ հարաբերություններն ու սպասում ենք, որ մեզ կներեն այդ ամենը։ Դա չի ներվում, երբ անցնում ես կարմիր գծերը։ Ոչ մի երկիր չի ներում», – ընդգծել է նա՝ նշելով, որ Հայաստանի շահերից է բխում գերտերությունների հետ լավ հարաբերություններ պահպանելը։
Անդրադառնալով երկրի անվտանգության ապահովման հարցին՝ Կարապետյանը կարծում է, որ այդ դերը կարող են ստանձնել միայն աշխարհի խոշորագույն կենտրոնները՝ ԱՄՆ-ը, Չինաստանը, Ռուսաստանը, ինչպես նաև Եվրոպական միությունը, եթե վերջինս ցանկություն ունենա դա անել։
Նա նաև անդրադարձել է ԱՄՆ պետքարտուղար Մարկո Ռուբիոյի հայաստանյան այցին՝ նշելով, թե դժվար է կանխատեսել այդ այցի հետևանքները, քանի որ, նրա կարծիքով, Նիկոլ Փաշինյանը ի վիճակի չէ ստորագրելու Հայաստանի շահերից բխող որևէ փաստաթուղթ։ Կարապետյանի խոսքով՝ Փաշինյանը ստորագրում է միայն այն փաստաթղթերը, որոնք ներկայացնում են իրեն։
