ՀՀ քննչական կոմիտեն հայտնում է, որ «Ուժեղ Հայաստան» կուսակցության և «Մեր ձևով» շարժման համակարգող խորհրդի անդամ Ալեքս Ալեքսանյանի նկատմամբ հարուցվել է հանրային քրեական գործ՝ հավաքին մասնակցելու նպատակով մարդկանց նյութապես շահագրգռելու և առանձնապես խոշոր չափերով փողերի լվացման մեղադրանքներով։
Նախաքննական մարմինը պնդում է, որ 2025 թվականի սեպտեմբերից մինչև 2026 թվականի մայիս ընկած ժամանակահատվածում Ալեքս Ալեքսանյանը «Մեր ձևով» ՀԿ-ի գրասենյակներում ձևականորեն աշխատանքի է ընդունել շուրջ 1400 քաղաքացու, որոնցից ավելի քան 400-ը համատեղությամբ աշխատել են նաև այլ ընկերություններում։ Նրա նպատակն էր ծառայությունների մատուցման պայմանագրերի հիման վրա հավաքագրել մասնակիցներ «Ուժեղ Հայաստան» կուսակցության և «Մեր ձևով» շարժման կազմակերպած ցույցերին և հավաքներին։
Քննչության ընթացքում պարզվել է, որ 2025 թվականի հոկտեմբերի 8-ից մինչև 2026 թվականի մարտի 31-ն ընկած ժամանակահատվածում «Մեր ձևով» ՀԿ-ի բանկային հաշիվներին Ս.Կ.-ի հետ փոխկապակցված «Տաշիր» բարեգործական հիմնադրամից, «Ինտեգո Էներգո» և «Տաշիր Կապիտալ» ՓԲ ընկերություններից փոխանցվել է հանցավոր գործունեության արդյունքում ձեռք բերված շուրջ 1.6 մլրդ դրամ, 230 հազար եվրո և 75 հազար ԱՄՆ դոլար։
Ըստ նախաքննական մարմնի՝ Ալեքս Ալեքսանյանը, օրինական գործունեության պատրվակով լեգիտիմացնելու նպատակով, աշխատանքի ընդունված քաղաքացիներին մեկ կամ ավելի ամիս որպես աշխատավարձ է վճարել՝ նյութապես շահագրգռելով մասնակցել կազմակերպած ցույցերին։ Շատ աշխատակիցներ աշխատանքի չեն հաճախել կամ այցելել են գրասենյակներ միայն մեկ կամ մի քանի անգամ։
Հարցաքննվել է շուրջ 500 անձ։ Նախաքննության ընթացքում պարզվել է, որ Ալեքս Ալեքսանյանը հանցավոր գործունեության արդյունքում ձեռք բերված գումարներից որպես աշխատավարձ է հատկացրել 703 մլն 835 հզր 953 ՀՀ դրամ, իսկ որպես քաղաքացիաիրավական պայմանագրով աշխատանքի վարձատրություն՝ 59 մլն 428 հզր 521 դրամ, ընդհանուր՝ 763 մլն 264 հզր 474 դրամ։
Ալեքս Ալեքսանյանի նկատմամբ հանրային քրեական գործը հարուցվել է ՀՀ Քրեական օրենսգրքի 236-րդ հոդվածի 2-րդ մասով և 296-րդ հոդվածի 3-րդ մասի 3-րդ կետով։ Նա ձերբակալված է՝ կալանքը որպես խափանման միջոց ընտրելու նպատակով։
